WWW.ХХС.RU \ О ВЕРЕ И ЦЕРКВИ \ СЛОВО ПАСТЫРЯ \ О БОГОЛЮБСКОЙ ИКОНЕ БОЖИЕЙ МАТЕРИ \ МОЛИТВОСЛОВИЯ
ПОИСК    
РУССКАЯ ПРАВОСЛАВНАЯ ЦЕРКОВЬ КАФЕДРАЛЬНЫЙ СОБОР ПАТРИАРХА МОСКОВСКОГО И ВСЕЯ РУСИ
_СЛОВО_ПАСТЫРЯ_


МОЛИТВОСЛОВИЯ КО ПРЕСВЯТОЙ БОГОРОДИЦЕ И ПРИСНОДЕВЕ МАРИИ ПРЕД ЕЯ ИКОНОЮ "БОГОЛЮБСКАЯ"

Чудотворная икона Божией Матери, именуемая Боголюбско-Московская. Храм Петра и Павла у Яузских ворот в Москве.
Чудотворная икона Божией Матери,
именуемая Боголюбско-Московская.
Храм Петра и Павла у Яузских ворот в Москве.


МОЛИТВА ПЕРВАЯ

О, Пречистая Госпоже Богородице, Мати Боголюбивая, Надеждо нашего спасения! Воззри милостивно на предстоящия с верою и любовию и покланяющияся Пречистому образу Твоему; приими наше хвалебное пение сие и пролей теплую Твою молитву о нас грешных ко Господу, да, презрев вся наша согрешения, спасет и помилует нас! О, Предивная Владычице! Покажи на нас чудныя милости Твоя. Молим Тя умиленно, избави нас от всякия скорби, настави на путь всякия добродетели и благостыни, спаси от искушений, бед и болезней, изми от нас оклеветания и ссоры; сохрани от молниеноснаго грома, от запаления огненнаго, от глада, труса, потопа и смертоносныя язвы; подай нам Свою милостивую помощь на пути, в мори и на суше, да не погибнем люте. О, Всемилостивая Боголюбивая Мати, с твердым упованием возсылаем к Тебе нашу смиренную молитву! Не отрини наших слез и воздыханий, не забуди нас во вся дни живота нашего, но всегда пребывай с нами, и Твоим заступлением и ходатайством у Господа подаждь нам отраду, утешение, защиту и помощь, да выну славим и величаем Преблагословенное и Всепетое имя Твое. Аминь.


МОЛИТВА ВТОРАЯ

О, Чудная и Вышшая всех тварей, Царице Богородице, Небеснаго Царя Христа Бога нашего Мати! Услыши нас, грешных и недостойных раб Твоих, в час сей молящихся и припадающих к Тебе с воздыханием и слезами, и умильно глаголющих: изведи нас от рова страстей, Владычице: избави нас от всякия скорби и печали, огради от всякия напасти и злых клевет и от неправеднаго и лютаго навета вражия. Можеши бо, о, Благодатная Матерь наша, не точию от всякаго зла сохранити люди Твоя, но и всяким благодеянием снабдити и спасти: разве Тебе иныя Предстательницы в бедах и обстояниих и теплыя Ходатаицы о нас грешных не имамы к Сыну Твоему, Христу Богу нашему, Егоже умоли, Владычице, да, спасеннии Тобою, славим и в будущем веце Всесвятое имя Сына Твоего и Бога нашего, купно со Отцем и Святым Духом, ныне и в безконечныя веки. Аминь.


ТРОПАРЬ, ГЛАС ПЕРВЫЙ

Боголюбивая Царице, Неискусомужная Дево, Богородице Марие! Моли за ны Тебе Возлюбившаго и Рождшагося от Тебе Сына Твоего, Христа и Бога нашего, подати нам оставление прегрешений, мирови мир, земли плодов изобилие, пастырям святыню и всему человечу роду спасение. Грады наша страны Российския от нахождения иноплеменных заступи и от междоусобныя брани сохрани. О, Мати, Боголюбивая Дево! О, Царице Всепетая! Ризою Своею покрый нас от всякаго зла от видимых и невидимых враг защити и спаси души наша.


КОНДАК, ГЛАС ТРЕТИЙ

Дева днесь предстоит Сыну, руце Свои к Нему простирающи, святый князь Андрей радуется, и с ним Российская страна торжествует, нас бо ради молит Богородица Превечнаго Бога.


ВЕЛИЧАНИЕ

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Источник:
Официальный сайт Самарской епархии